ਜਦ ਦਿੱਤੀ ਕੁੱਕੜ ਬਾਂਗ
ਖੁੱਲ੍ਹ ਗਈ ਅੱਖ ਸਰਾਭੇ ਦੀ
ਕਰ ਇਸ਼ਨਾਨ ਸੀ ਪੜ੍ਹ ਲਈ ਯੋਧੇ
ਬਾਣੀ ਬਾਬੇ ਦੀ
ਫਿਰ ਕਰਕੇ ਮਾਂ ਨੂੰ ਯਾਦ ਕਹਿੰਦਾ
ਮਾਂ ਪੁੱਤਰ ਤੇਰੇ ਨੇ
ਨੀ ਅੰਮੀਏਂ ਅੱਜ ਜਾ ਕੇ
ਮੌਤ ਨਾਲ ਲੈਣੇ ਫੇਰੇ ਨੇ
ਕਰਕੇ ਨਾ ਘਬਰਾਵੀਂ ਯਾਦ
ਪੁੱਤਰ ਦੇ ਘਾਟੇ ਨੂੰ
ਸਭ ਭਾਰਤ ਪੁੱਤਰਾਂ ਦੀ ਮਾਂ
ਸਮਝੀਂ ਆਪੇ ਨੂੰ
ਏਕ ਮੂਆ ਤੋ ਕਿਆ ਹੂਆ
ਪੁੱਤ ਹੋਰ ਬਥੇਰੇ ਨੇ
ਨੀ ਅੰਮੀਏਂ ਅੱਜ ਜਾ ਕੇ
ਮੌਤ ਨਾਲ ਲੈਣੇ ਫੇਰੇ ਨੇ
ਅਸੀਂ ਤਾਂ ਆਪਣਾ ਫਰਜ਼ ਨਿਭਾ ਕੇ
ਮਾਏ ਨੀ ਤੁਰ ਜਾਣਾ
ਇਹ ਗੋਰੇ ਦਾ ਰਾਜ ਵੀ
ਵਾਂਗ ਪਤਾਸੇ ਖੁਰ ਜਾਣਾ
ਹੋਏਗਾ ਇੱਕ ਦਿਨ ਚਾਨਣ
ਦੂਰ ਭੱਜ ਜਾਣੇ ਨ੍ਹੇਰੇ ਨੇ
ਨੀ ਅੰਮੀਏਂ ਅੱਜ ਜਾ ਕੇ
ਮੌਤ ਨਾਲ ਲੈਣੇ ਫੇਰੇ ਨੇ
ਜਿੰਨਾ੍ਹਂ ਆਪਣੀ ਗੈਰਤ
ਦੁਸ਼ਮਣ ਅੱਗੇ ਵੇਚ ਲਈ
ਕਰਨੀ ਕੀ ਕੁਰਬਾਨੀ ਉਨ੍ਹਾਂ
ਮਾਏ ਨੀਂ ਦੇਸ ਲਈ
ਨਹੀਂ ਗੁਲਾਮੀ ਸਹਿਣੀ
ਰੱਖਣੇ ਡਾਂਗ \’ਤੇ ਜੇਰੇ ਨੇ
ਨੀ ਅੰਮੀਏਂ ਅੱਜ ਜਾ ਕੇ
ਮੌਤ ਨਾਲ ਲੈਣੇ ਫੇਰੇ ਨੇ
ਐਵੇਂ ਭਰਮ ਹੈ ਗੋਰੇ ਨੂੰ
ਕਿ ਗਦਰ ਦਬਾ ਦਿਆਂਗੇ
ਪਰ ਅਸੀਂ ਗੋਰੇ ਦੀਆਂ
ਨਾਸਾਂ ਦੇ ਵਿੱਚ ਧੂਆਂ ਲਿਆ ਦਿਆਂਗੇ
ਵੇਖੀਂ ਵਿੱਚ ਮੈਦਾਨ ਦੇ
ਹੁੰਦੇ ਕਿਵੇਂ ਨਬੇੜੇ ਨੇ
ਨੀ ਅੰਮੀਏਂ ਅੱਜ ਜਾ ਕੇ
ਮੌਤ ਨਾਲ ਲੈਣੇ ਫੇਰੇ ਨੇ
