ਤਾਰੇ ਟੁੱਟੇ – ਡਾ ਅਮਰਜੀਤ ਟਾਂਡਾ

0
64

ਮਿਲਣ ਜਾਂਦਾ ਹਾਂ ਕਿਸੇ ਨੂੰ ਤਾਰੇ ਟੁੱਟੇ ਦਿਸਦੇ ਹਨ ਰਾਹਵਾਂ ਵਿੱਚ
ਢਹਿ ਰਹੇ ਹਨ ਸਿਰਨਾਵੇਂ ਘਰਾਂ ਦੇ ਦੇਖਦਿਆਂ ਖੜ੍ਹੇ ਭਰਾਵਾਂ ਵਿਚ

ਰੋਟੀ ਕੱਪੜਾ ਕਦ ਮੰਗਿਆ ਸੀ ਮੰਜ਼ਿਲ ਦਾ ਇੱਕ ਚੰਨ ਕਿਹਾ ਸੀ
ਮੈਥੋਂ ਮੇਰਾ ਦਰ ਘਰ ਲੈ ਲੈਂਦੇ ਕੀ ਰੱਖਿਆ ਇਹਨਾਂ ਥਾਵਾਂ ਵਿਚ

ਖੇਡਣ ਲਈ ਇੱਕ ਧਰਤ ਦਾ ਵਿਹੜਾ ਝੂਟਣ ਲਈ ਅਰਸ਼ ਪੰਘੂੜਾ
ਗੀਤ ਲਿਖਣ ਲਈ ਸਫ਼ਾ ਨਦੀ ਦਾ ਸੰਗੀਤ ਪੱਿਤਆਂ ਹਵਾਵਾਂ ਵਿਚ

ਲੈ ਜਾਓ ਮੇਰੇ ਕੋਲੋਂ ਗੁਨਾਹ ਆਪਣੇ, ਫਿਰਦੇ ਜਿੰਨੇ ਖ਼ੁਦਾ ਆਪਣੇ
ਘਰਾਂ ਦਰਾਂ ‘ਤੋਂ ਅੱਗ ਜੇਹੀ ਲੈ ਜਾਓ ਰਹਿਣ ਦਿਓ ਰੰਗ ਛਾਵਾਂ ਵਿਚ

ਅੰਨ੍ਹੀ ਇਹ ਅਦਾਲਤ ਲੈ ਜਾਓ, ਕੁਫ਼ਰ ਲੱਦੀ ਵਕਾਲਤ ਲੈ ਜਾਓ
ਮੇਰੇ ਹਿੱਸੇ ਦਾ ਕਫ਼ਨ ਜੋ ਬਚਿਆ ਛੱਡ ਜਾਇਓ ਗਰਾਵਾਂ ਵਿਚ

ਚੁੱਪ ਤੇਰੀ ਤਸਵੀਰ ਕੀ ਕੰਮ,ਲਿਸ਼ਕਦੀ ਇਹ ਸ਼ਮਸ਼ੀਰ ਕੀ ਕੰਮ
ਗਲੀਆਂ ਚੋਂ ਨਫ਼ਰਤ ਲੈ ਜਾ ਗੱਲਵੱਕੜੀ ਰਹਿਣ ਦੇਈਂ ਬਾਹਵਾਂ ਵਿਚ